Gusii

Obororo Bonchunia!

Kerubo Nchogu nigo are omoriki omogeni o Gusii.com. Onye gotagete koba omoriki omogeni ase Gusii.com, koranche toma riuko ase Abagusii AT Gmail.com.

Nabasogeirie. Oy'okobwatia nomogano omokeigo buna chiyunibasiti chiato mono mono chiria chiekanisa chianchire chiropia(chibesa) inabuga ntebie abaminto. ekiagera buna abasongo bagoteba "a problem shared is a problem solved"
Egokie. 

kerubo Nchogu.
Gaki obororo bonchunia!

Abagusii baito tegerera moigwe ebirero biane igoro ye chisukuru chiato chianchire chibesa mono kobua obwanchani bw’Egekristo n’obomo bwa mwanyabanto. 

Ngasoa eyunubasiti omwaka o 2008 nganetie gosomera amang’ana a communication. Tigang'o toroke eyunubasiti eye Mapaesa tibacha kong’ira korti nabesa tindi. 

Ekero nasoa Mapesa yunibasiti egento egetang’ani bansabete n’echiribu isato erinde gaki bantarie sobo abwo banyorokie ase ebirasi n’echichoo chigotoka. Nkagete gwa akire chitorobini motwe kare kwarorire irenga bagocha kong’akania aseng’encho y’amasomo, onye echoo yoka kingosabwa eribu tatu. 

Ngasuka motwe nkamanya gosabwa chiribu saba mia nne kera ensa omwarimu agotenena motwe yane. Amang’ana agachaka gokong’a, korende ase okomwegena Nyasae n’obwanchani bwaye, nkamanya ng’a nanyare gonkonya erinde erio nkore amasomo ayio. 

Keri keri, ntarakora ninkora esemesta entang’ani, chiropia chikamentwa igoro. Igo naende konye bamentire amatumisi amake amake ayio batari korika ase e “fee structure” yabo. Kaa ekero ogocha gokora goakana okonyora ng’a chiamentirwe igoro ang’e chiribu isano. Echio batakorikereti ase e "fee structure" igoro egere bw’echoke kendabu. 

Okage mang’ana ayio taisaini gokora omonto otagete amasomo gokwa omoyo, bakamanya korigia ching’encho chinde chia okomintontia ebisiringi binde kwabwate. Eng’encho eyemo n’eyokobeka chikosi chiao ang’e chionsi rituko ne chinsa echimo egere tochikora bwango. Ogotakora bwango kwao kwagera kwanya kobaakana bibesa bike bike be bi’ebinto buna- "Printing charges, administrative fee, technology fee (okage eprinter tari technology!)" nabonto bonde buna obwo. 

Bono eki gekong’ichania mono, Mwanyagetinge tegerera, aa nao ebirero bichakerete. Aba n’Abakristo –gaki nche nabo bantebetie. Bakweroka na gotarera erieta ria Yeso. Yeso oria nkoigwa orenge omonyamabera amange, Yeso bw’obwanchani botaere, ee Yeso omoadvoketi bw’abataka. 

Eki gekong’ichania Mwanyagentinge, abaminto egekong’ichania; banto aba mbari mabera. Onye tokonyara goakana besa chionsi rimo, nigo ogotebigwa oichorie efomu ya “instalments” yaani omobango bw’ogoakana chibesa echio ng’ora ng’ora. Yaya , tari ayio akonderia, mm.... mmh..... Ekigekonderia neke, efomu eyio ekoonigwa chiribu ibere. Ee nabo onyigwete chiribu ibere. 

Onye ekosi yao gekoira emiaka ene naende tori kwenyara mobuko buuya, igo kwarure chiribu ikomi na isano isato ase okogora efomu. Onye bagocha gokonyoria amasomo ao ase okobeka chikosi chiao amo amo omente esemesta eyemo gose ibere… igo moigwete esabu eyio. 

Egwakumirie ayio, korabwata ogokumia kwao. Korakomera ndugu yangu. Barabwo mbari gwancherana magosa. Nigo ogotebigwa maiso marore k’omochando obeire ng’a “ekio n’ekiona kiao omwanafunzi” 

Esemesta eye yaeta, omongwana gete, akeriika gokora chikosi inye. Agacha kera ekerasi atari komocha nonya nekemo. Gaki onye omochete… yaya bionsi nao arenge. Engaki y’ogokora amatemwa egaika agatebigwa taakaneti besa aseigo tagokora matemwa. Tari mang’ana, sukuru teri kogendigwa n’amache goika abarimu baakanwe, esitima ne binto binde biakanwe igo nonya ninche tinarenge gocha koa monwana oyio matemwa. 

Tinarenge gocha komoa onye taakeneti besa. Korende naakanete nechikompyuta chiabwate eitirabu. Bakamwoonchia, bakamwoonchia, mpaka amatemwa akaera. Takoreti matemwa ayio. Aiga mang’ana aria ye chisukuru chieserekari y’ogokora amatemwa atangwa mpaka gwaakanire taiyo. Igo mongwana oyo takoretie matemwa ayio. Ekero bagocha korosia ekompyuta yabo, akobaorokia amarisiti omongwana oria are kobaa na y’ekeene bakamotebia “pole”  

Pole? Pole? Chibesa nechinsa chiatumegete ase emetienyi ene bila gochi esukuru, amairi atenenetigwe ase emetienyi eyio, chisoda n’emegati atigete taria kaminyokerete ekerasi. Bionsi biabekwa ase akang’ana akamo akeng’e. Gatairie nakaira esekondi eyemo goatora. Pole! Wa! Baba kerubo yaa! Obororo bonchunia!

Abagambi Ba Gusii

Abagambi ba Gusii amo na Omoroberio bwa Amachiko. Bokongu tiboiyo.

Tagesia

Na Priscilla Nyanduko Gekonge. Omoriki o Gusii.com, Kisii.

Rara ne eriso erimo.

Ebitage Aaria Bogetutu

Na Joshwa Araka, Omoriki o Gusii.com korwa Nyamira.

Omosacha oyomo nigo atoretigwe amo na abanyanyimbo igoro korwa ase abanyakenyoro aaria Manga Distrikti. Nigo kiabete inga omosacha oyio nigo atacherete omwana oye ore emiaka 9 inse.

Nigo egotebekana inga omosacha oyio nigo angainete omwana oyio oye gochia ase egetanda na gokora ebitage ebio. Abanyakenyoro ba Kiogutwa Sabu Lokesheni aaria Bogetutu Ya Gati nigo baigwete bobe na komotwanga ebiranya. Konyora omokungu bwo omosacha oyio ochire echiro ekero ebitage ebio biakoretwe.

Omwana oyio nigo atebetie ngina nonya omosacha oyio omokanetie. Omwana oyio, kare no obwoba nigo atebetie abanyakenyoro buna ise amongainete gochia borere na komotachera inse.

Abasigari nigo bamonyereretwe na goika bwango gotoria omosacha oyio. Nigo airetwe erumande aaria Nyamira. Ekina kiaye nigo gekare ewiki eye. 

Amang'ana A Nyamira

Bado intobwate obokongu aaria Nyamira. Ingai abanyanyimbo bare?  Baminto!

Obokongu Aaria Nyabite

Ebitage Aaria Nyabite. Na Joshua Nyangau Araka, Omoriki Omogeni ase Gusii.com

Omobucheri oyomo orasirwe. Agnes Nyaboga nigo arasetwe Jumapili botuko aaria Nyamira Distrikti. Nigo kiabete inga Agnes Nyaboga nigo aiteretwe aaria ase echiro ya Nyabite amo ne ebibago ebio biatamete gochia ase egesunte ime.

Eki araseretwe? Onde tamanyeti nonya amange akwanirwe igoro yo ogoitwa kwaye. Abairi ba Agnes Nyaboga oyio ore ange emiaka 20 nigo bagoteba inga nigo aumerete abaibi barenge koiba etuka ere ange ne ebucheri yaye. Abanyanimbo nigo bagoteba inga abaiti abwo nigo bachete komoita ekiagera tibamoibereti kende.

Nyamira OCPD, omosike Shadrack Maithya nigo atebete inga nigo ekororekana inga ebibago ebio nigo biatagete goita Agnes Nyaboya ekiagera nigo batamete ekero bamoitete.

Abairi ba Agnes barabwo nigo bagoteba inga Agnes nigo achiete etuka eyio abwo ase aumerete abaiti abwo bakwomana amo no omonyene etuka eyio. Agnes agataka kobatorania. Eriomana rigasoa. Agnes agaitwa.

Obokongu obwo nigo bwabete ange chinsa isato chia botuko. Abanyakenyoro nigo batemete komoikia nyagitari aaria Nyamira. Rakini Agnes nigo asirerete abwo Nyamira District Hospital.

Abanayakenyoro nigo baigwete bobe. Nigo batebete inga abanyanyimbo tibari gocha bwango ekero obokongu bwabeire. Nigo egotebekana inga abaiti abwo konyora bakorire oboibi obonge konyora bataraita Agnes Nyaboga.

Abasigari barabwo nigo bagoteba inga nigo baigete ase obobe obwo ange chinsa inye chia botuko. Nonya nabo igo, nigo batebetigwe ase obwango. Komenta nayio, nigo bare 1 km korwa ase Agnes aiteretwe.

Ase obotuko obwo, abanyanyimbo nigo batemete gokora obotuki obotuko obogima rakini tibarasiba onde ase engaki yo okorika amangana aya. " Twachakire obotuki obonene. Bari bakorete ebitage ebi imbache babekwe chingayo na kworokigwa amachiko," OCPD Mathiya nabo atebete.

Karibu Omoriki Joshua Nyangau Araka ase Gusii.com

Engana Yo Omosike Magara

Omosike Omingo Magara nabwate engana.

Obokongu Aaria Atlanta

Nigo ere omoichano omonene ase ogotangasa ogosira kwo omogaka Charles Mogaka. Omosike Charles nigo asira nyuma yo okorwara na kogenda nyagitari kobarwa aaria Grady Memorial Hospital, Atlanta. Omosike Mogaka nigo asira chitariki 13 chio omotienyi oyo.
 Marehemu Mogaka nigo atiga omongina oye maega amo na abana abwo bare   Joseph Kimaiga o Jonesboro, GA, Sospeter Bangoya o Nairobi, enyaroka  Faith Kerubo o Nairobi . Abamura bamwabo nigo bare Peter na  Evans Mogaka, bonsi ba  Atlanta, GA.

Emepango nere aroro yo okoira omobere o Charles inka Kenya.  Amasabo, ebitoro amo na okoa abamwabo riberera inkogendererete kera rituko ase enka ya momura omwabo, Peter Mogaka aaria  5498 Sweetsprings Dr. SW, Powder Springs, GA 30127.
Konyora atarasira, omogaka Charles tabwate gasi ende yonsi. Konyora yabeire akongu ase ogokora egasi ekiagera tarenge korora.  Ase boigo, tabwate insuwarensi.  Abaminto, okogania nkore aroro okonene erinde omobere oirwe Kenya.   Ka moranche tebia abande mokonyora engana eye. Imbuya mono.
Ase okomanya amange, ka moranche aaka esimi ase :
Peter Mogaka 678 760 5457    Evans Mogaka 678 422 9530
Steve Kibwage 678 462 1443    Jones Onwonga 404 663 9449
Moses Bosire 770 912 2065    Andrew Bwoma 678 665 0194
Julius Ogachi 678 698 3145    William Kiriago 770 837 4581
Nicholas Moenga 404 454 3201    Fred Ondieki 678 463-5051

Amasabo amo na omochango noche obe  Esabato eye chitariki 1-23-10 aaria K.A.C.C. (Kenyan American Community Church)
771 Elberta Dr.
Marietta, GA 30066.

"Mogambi Taiyo," Mhe. Kenneth Marende

Omosike Omingo Magara, omojumbe omokoro o South Mugirango

Omotebi o Bunge orure ogochika. Bogirango Irianyi tebwati omochumbe.  Mhe. Kenneth Marende nigo atebete igoro inga ase engencho Bogirango Irianyi etabwati omojumbe, bono tiga chikura chiakwe. Bogirango Irianyi nigo yaba etabwati omojumbe ekero omosike Omingo Magara arusigwa ekerogo ekio ne Ekoti Enene ya Kenya, Kisii.

Ase okoinyora, Omosike Manson Oyongo Nyamweya nigo atebete inga amagoso narenge ase chikura chia 2007 echio chiagerete Mhe. Magara akaba omojumbe. Ase chikura echio chia 2007, Mhe.James Omingo Magara nigo abwete ne chikura 10,204. Omosike Ibrahim Ayiema Ochoi akaba oyo okabere ne chikura 5,848.

Konyora omosike Marende atarateba igo, omosike Magara nataka Ekoti Enene Ya Kenya eonchore obogambi obwo bwarwetwe aaria Kisii amo na Omojaji omonene, omosike Daniel Musinga. Rakini bono Abagirango Irianyi imbache baake chikura. IIEC nigo ebwate amatuko 90 goakia Abananchi chikura. Intotebigwe.

Amangana korwa e Nation. Priscilla Nyanduko Gekonge nigo are Omoriki Omokonyi ase Gusii.com

Omosacha Osinyirwe Egasi

Tatageti gokora kende

"Tiga enyangi eere," Nabo omojaji atebete. Omosubati oyomo bwancheirwe korusia ebitinge aaria Ogembo ime ya Gucha. Ninki? Omosacha bwangire gokora egasi. Tari igo rioka. Nigo omosubati oyio atebia ekoti inga omosacha oyio nigo ataka abasacha bande bamokorere egasi eyio. Yaani manya.

Omojaji omonene bwe Ekoti Ya Gucha aaria Ogembo, omosike Richard Koech nigo atebete inga Gesare Okechi tiga arusie ebitinge. Enyangi gati ya Gesare Okechi na Geoffrey Getate nigo yakoretwe ase omwaka o 2007 aaria Nyabonge SDA Church. Korwa erio, Gesare oganyire. Oganyire. Oganyire igo,  impaka orosire.

Gesare nigo atebetie Ekoti inga , omosike Getate "Tanya gokora kende."  Tari igo rioka. Nigo atagete abamura bande bamokorere egasi. Geoffrey Getate ere ninki agoteba? Nigo agoteba inga endagera akoria nero yamoire obokongu. Ekogera tagokora kende. Gotatwara chinguru. Kende tikeiyo.

Omopasta oria otenenerete enyangi eyio aaria Nyabonge SDA Church nigo atebete inga otemire gonsonsorana Gesare na Geoffrey rakini gokonya tikoiyo. Omojaji ere nigo atebete inga rende omosacha gasinyinrwe egasi, tiga ebitinge birusigwe.

Amangana a Gucha korwa ase Angwenyi Gichana o Mars Group.

Priscilla Nyanduko Gekonge nigo are Omoriki Omokonyi ase Gusii.com