Gusii

Omorero aaria Baraton University

Abana saidi ya 2000 nigo bakorete amaandamano aaria Baraton University igoro botuko. Ase Ki? Tibabwate chibesa chie efisi. Bagakanigwa inga tibagokora amatemwa. Ebinto be esukuru nigo biasaretigwe.

Endara Enene Aaria Nyamira

Na Joshua Araka: Gusii.com, Nyamira

Endara ya Mhe. Kalonzo

Omokonyi bwo Omogambi, Mhe. Kalonzo Musyoka nigo autererete ODM omorero igoro. Nigo Mhe. Musyoka atebete inga ODM nero yagerire omopango bwa amachiko otaraba ase ense yaito. Kobwatekana no omokutano bwa abajumbe aaria Naivasha oria otenenetigwe, Mhe. Musyoka nigo atebete inga ODM nero ekobeka amarindi.

Mhe. Kalonzo Musyoka nigo autete endara eyio aaria Nyamira North igoro ase ebirero bio omongina Esther Ndege Momanyi. Omongina Esther nere ore mama omwabo omowakili Ben Momanyi. Ase okoinyora, omosike Ben Momanyi nigo aboretie obojumbe bwa Bogirango Sugusu ase omwaka o 2007. Ase Chikura echio, omosike Momanyi nigo arenge ase ekeombe kia ODM-K. Nigo omosike Ben Momanyi abwetwe chikura echio na Mhe Wilfred Ombui. Ase ebirero ebi, Mhe. Ombui tarenge aroro. 

Mhe. Musyoka nigo atebete inga AbaKenya abange nigo batagete omopango bwa amachiko oere rakini ODM yabekire emekorogoto emenene. " Nigo Abananchi baakanete Ksh 40 millioni. Chibesa chia abaaki epango. Chikagenda engoro ime ekero omokutano oyio o Naivasha otenenetigwe." Nabo Mhe. Kalonzo Musyoka amentete.

Ekero omokansolla Ben Nyaberi aboretie inga ninki gekogera abanganyi ba omwaka o 2007 aaria Nyamira bataraakanwa chibesa chiabo, Mhe. Kalonzo nigo atebete inga imbache baakanwe bwango. Omongina Esther Ndege nigo abwate abana 13 amo ba abachoro na abachokororia abange. Nigo asira ore emiaka 85. Tari Mhe. Kalonzo Musyoka bweka obwate engana.

Omoriki bwo ODM aaria Bomet, omosike Ronoh Kiplelelyet nere nigo amentente chinko ase omorero o Mhe. Kalonzo. Nigo atebete inga "Nigo mwakorete Mhe. Simeon Nyachae. Ase boigo nigo motagete gokora Mhe. Sam Ongeri amo na omosike Omingo Magara. Abagusii ingai morigereretie? Nigo mokoagacha naende mwatagora"

Tari Raisi Igo

Notagete konywoma okokungu o kabere? Tari raisi igo endugu. Karaboria mokao ritangani.

Dr. Bitange Ndemo Nabwate Eng'ana

Dr. Bitange Ndemo nabwate obosemi ase eserikali. Rakini ningo otegererete?

Emechando Ya Dr. James Gesami

Joshua Araka na Dan Nyakundi. Gusii.com, West Mugirango

Dr. James Gesami, MP, West Mugirango

Omominista omoke Dr. James Gesami nabwate emechando. Bono kiabeire inga Ksh 15 millioni chia Abananchi ba West Mugirango tichimanyiri ase chiachia. Dr. Gesami, oyio ore omojumbe o West Mugirango oborigwe aimokie egetuo ekenene ase abaibi simbiri be chibesa echio chie ekonstituensi eyio.

Mhe. Gesami nigo atenenetie abanene ba CDF ya West Mugirango Tichi Rimo eye ekero Abananchi baimokia ekurate inga chibesa chiabo chiaibirwe. Ase boigo, omonene bwo ofisi ya CDF, omosike Atei Onsomu nigo atenenenigwa egasi ase engencho yo ogotanga Abananchi tibakorora omojumbe obo, Mhe. James Gesami. Ase boigo, nigo kiabete inga omosike Onsomu nigo are omoenenu.

Ase rituko ria igoro, omonene bwe ekeombe gia Kenya Social Congress (KSC), omosike Nelson Onduko nigo atebete inga Mhe Gesami nigo atenenetie abanene ba CDF bira kororora inga imbaimokeretigwe ebitambokero.

"Egetambokero eke omojumbe aimogetie nigo giatakeire gokorwa emiaka ebere yaerire. Nigo twamotebetie inga abateneneri aba ba CDF ya West Mugirango na abaibi simbiri." Nabo omosike Onduko, oyio ore omokansolla ase Etaoni Ya Nyamira amentete.

"Nonya Dr. Gesami otenenerie abaofisa abwo ba CDF, nigo totagete abatuki ba Kenya Anti Corruption Commission bachekie ebitabu bia CDF ya West Mugirango." Omosike Nelson Onduko nabo atebete.

Amagenderero a West Mugirango atenenire ekiagera  chibesa chiabangetwe gokora amagenderero ayio tichiyo. Ase omokutano o Tichi rimo eye yaetete, abaofisa bane ba CDF imbatenenetigwe egasi. Dr. Gesami nigo aboretigwe na gotebigwa inga goika ajadiliane na Abananchi ekero abanene ba CDF bagochorwa  erinde amagoso buna ayio taba naende.