Omoriki ne Edwin bw’ Okong’o, Omwana Oito o Mache Ng’umbu
Kero kende konde Nairobi togaikaransa emesa koragera no omosani one okorokwa Motanya na momura oye Mogeni. Omong’ina oye Nyakerario konye ominire obokima bw’ obori ne enyama ye embori, chinsaga na amabere amaruranu amaroro se abwate amakombi amanene ndagoake bwateke erogoma.
Tokaigatera bono obokima egesamaro, no omong’ina Nyakerario okona gototiotereria.
Omong’ina agatotebia, “Bobege moigote kegima. Ninwe abamura mogokiina.”
Motanya akamotebia, “Omwanchi, gaki inche no omogaka omogotu tari bono ngokina. Nche nigo nkoria bosiniini.”
Intwe abamura tokagenderera. Tokabosimbaga buna abana be esekenderi enchara eitete ekero abarimu barire chibesa chibwenerete kogorera abana endagera eisaine. Nainche buna konye narure Mache Ng’umbu ase ntari konyora bosie bwa bori, nkaigatera. Mbwata obokima, mbobata ekegusii, mbwaterania enyama ne chinsaga, mbeka gochia monwa. Kobogotirimboka, ng’iyereria na amabere amaruranu.
Ekero twakoora bwonsi korwa ekee omong’ina akarangeria omosubati ore komokonya koruga arete obonde.
Nkamokania, “Yaya, Mami, inche naigotire.”
Omong’ina agatebia omosubati, “Retera Mogeni bono Omoamerika ere tiga ange onarire ebitoche bia Mache Ng’umbu.”
Mogeni nere agakana, “Mami, yaya. Nabeire buna riria nabete.”
Ngachia koigwa igo, ngaseka, ngaseka, ngaseka, mbaka ngaturungana. Naende ngaseka, ngaseka mbaka nkarera. Naende ngaseka, ngaseka, yaani ngaseka mbaka bagakaga nabeire richara. Chimbaru chikang’atia.
Konakora goseka kamoboria, “Mogeni, ng’ai omanyerete omogano oyio?”
Mogeni akaboria, “Mogano ki?”
O Motanya na Abanyaribari, no omogano oyio no oyoseito, aria Nyamira, Bogirango Bosongo.
Seito Makairo omogaka oyomo narenge ore korokwa Gesokera Nyandagesera bwanchete enyama mono. Rituko erimo omogaka onde ore korokwa Nyakundi akamochiika ekegeni komana chiombe. Ekero baika aroro, Gesokera agasokera endagera mbaka agasinywa koimoka. Endagera eyio aigaterete egachaka komobeta korwa nda. Agachaka gokema na kwana buna emori yarire chibando chinyinge ekooreka. Abamura makamobogoria gochia sukunyoma bakamwengera esabuni aroka endagera abanto batano bararie baigote.
Abagaka ba seito bagasoka ase ogochika omonto okobasareria obogeni. Kobairana nka Makairo bagatiana buna onde tabase gochika omogaka Gesokera gochia kegeni kende.
Naende rinde bono Makairo gekirete tokoigwa buna omogaka onde okorokwa Ndemo nere orangerigwe ekegeni. Agaetia abagaka bande tachiika Gesokera. Korende buna seito Makairo totari gokiria ng’ana, omonto akamonyerera Gesokera. Gesokera akagenda bw’ omogaka Ndemo akanyora abande no bare bakobanga esabaria. Akababoria gose mbamoire obogeni nere.
Ndemo kamokania, “Yaya, Gesokera, nkwaretete obosoku obonene o mosubati o Nyakundi. Aye ne esese embe etari bogeni.”
Gesokera agachaka gosorora buna omwana obwatirwe na amamocho ogosorora taitwa, “Yaya, gaki Tingonkora bo kabere, Ndemo.”
Ndemo akanga pi, “Yaya! Orabaise gochia gokwera aria oboko otoreterere.”
Gesokera agatugama nse na gosorora mono, “Gaki, gaki, gaki, abagaka baminto timontiga.”
Seito Gusii monto mosacha gocha gotugama nse na gosorora buna omwana nabo ogokaga buna na amaene agoteba. Abagaka bagancherana komoira oboko bwa Ndemo aaria Nyamusi Etari Bitutu, Bigirango Irianyi.
Ekero baigete ekegeni endagera ekarosigwa enyinge. Kobakona koragera botuko rende seito Gusii sitima etaiyo mono ne ebibeya togwokia. Bakaragera igo onde tachia korora Gesokera gagosokera naende.
Akaigatera bono naende mbaka enda ekaba buna omonyocho. Ekero yachaka komoresania Gesokera akaimoka korwa nyomba akagenda gochia gesona. Agetoora ebwobi okonagokema.
Omosae oyomo bw’ ekenyoro ekio okorokwa Momanyi akamorora. Akamoboria, “Omogaka, naki imbuya okare bori?”
Gesokera akamotebia, ogotogota but ekeragita, “Nabeire buna riria nabete.”
Momanyi akamoboria, “Naki kwabete?”
“Nabeire buna riria nabete.”
Momanyi agakaga Gesokera no oborwaire akabwate. Akaminyoka gochia eero ase abanto bare kona gosiba ekegara na gotengera chisani chia Christopher Monyoncho omwana bw’ Araka, riyo ri ebasweti.
Momanyi gateba, “Mochumbe, kararimia ekenada.”
“Yaa, Momanyi bono ne ebirecha bikoriete? Ndimie ekenanda abageni bagotenga? Tiga esani eye eraera.”
“Yaya, yaa, Mochumbe, oMogeni orwarire.”
Mochumbe akarimia ekenanda.
Momanyi akaboria, “OMogeni orwarire aa ogoteba buna obeire buna riria abete. Ng’o obwate eriogo riaye?”
Omogaka Ndemo akaminyoka gochia isiko ogoteba, “Obe! Obe! Obe! Oyio eriogo riaye ntomanyete. Mwengere esabuni Omo.”
Bakengera Gesokera esabuni. Bakamobetereria keero buna omwana ekengwerere bwangire konya erongori. Akaroka chinyama echinde chingima atatakuneti akamanya gocha koba buya.
Korwa erio onde tachia komochika Gesokera gochia bogeni bonde. Ekero seito Makairo twaigwete omogano oyio, togaseka. Gatwarageire twaigotire togachaka togoteba, “Nabeire buna riria nabete.”
Tomanya goseka bono buna amachore arorire chibando. “Ha ha ha ha ha ha ha! Nabeire buna riria nabete.”
Na seito Gusii bono buna tonarete goakaakania amang’ana buna embori ekonia egesero, ani amang’ana aikire Nyaribari sobo Mogeni.
Edwin bw’ Okong’o, Omosani omonene bwe Ekegusii nere omoriki bwo Omwana Oito o Mache Ng’umbu
Recent Comments